ഒരു യാത്ര മൊഴി

ഉറുമ്പാണെല്ലാമെന്നിൽ
മുല്ലെ ! പടരാതിങ്ങനെ 
നിനക്കു നീറുകില്ലെ ?

മറ്റു പൂച്ചെടികൾ കണ്ടില്ലെ 
ചായാതെ നോക്കാതെ 
നില്ക്കുന്നു ദൂരെ 

എത്രനീളം പടരാൻ 
കഴിയും നിനക്കിനി 
തൊടിയിലൊരുനാൾ
കത്തിതീരണമൊരു
പ്രണയമായ്

എന്നെയും നിന്നെയും
പരിപാലിച്ചൊരു ജര
നര വീണൂ കിടുപ്പുണ്ടവിടെ
തളർന്നുറങ്ങുന്നു നിശ്ചലം
ഇനി വൈകികൂട നിനക്ക്
പടരാനിനി ഞാനില്ല

ഇപ്പോഴുമാടുന്നുണ്ടൊരു
ഊഞ്ഞാലെന്നിൽ,
അതിലാടിയവരങ്ങോ
പറന്നുപോയീ തള്ളകിളിയെ
മറന്നുപോയീ ,

എന്റെ മടിയിലുറങ്ങുന്ന
വെയിലിനോടും
കുശലം ചോദിച്ചിരുന്ന
കാറ്റിനോടും യാത്ര
പറയണമെല്ലാവരോടും

ഘോഷയാത്ര കഴിഞ്ഞുവരുന്ന
ഉറുമ്പുകൾക്ക്‌ഞാനില്ലിനി
ശേഷിച്ചത് നിനക്കെന്റെ
വാടിയയിലകളും നിനക്ക്
കൂട്ടായി ചവിട്ടിയരച്ച പൂക്കളും
ചിതറി കിടക്കും ...